1Cor 13 | ASO | STEP | Ido' naza nene igi mili minilizani' aka lamine' ma atoli'mine ogo neine' ne'mi monovo nene lengelebizo lo-lengemelove. O'moso'mi Sikalahu' aza note atokuti' laa' amuzo nene vauve elo lemavosa eveneliti no'ninguti' nene ha laa' noolone' ido' angeloliti no'ningutikisi nene ha laa' nooloba laza lute nene evene' a'nene ma ngemamoso' ne'mo laza nene ngeu ngeu lo gamazi lamaa' neine' inite' pelo' nevo'mine mino haza inite' lolo' olosune.

1 Corinthians 13

Lute nGemaa' Nene Inite' Naba Neive Lo Ne'mi Monovo Lo-ngimine'

Ido' naza nene igi mili minilizani' aka lamine' ma atoli'mine ogo neine' ne'mi monovo nene lengelebizo lo-lengemelove.1 O'moso'mi Sikalahu' aza note atokuti' laa' amuzo nene vauve elo lemavosa eveneliti no'ninguti' nene ha laa' noolone' ido' angeloliti no'ningutikisi nene ha laa' nooloba laza lute nene evene' a'nene ma ngemamoso' ne'mo laza nene ngeu ngeu lo gamazi lamaa' neine' inite' pelo' nevo'mine mino haza inite' lolo' olosune. 2 Ido' O'moso'mi Sikalahu' ne'mo hize ele' o-ledavosa O'moso'mi veleti' gamazi lo soto' oga' amuzo dizo minine' do mino O'moso'mi gamazi suno' minine' muki' nene gelo monovo'vesi gele oku' lo mino O'mosomu' gele ele'vole' oga' noune' lelita nene naba minavo ne'mo golo mamu' akateloti' olovo' ozo lokunivo olovo' ilido' o neivosa nolone'za evene' lute ngemesa'mo minelone' ne'mo nene mo haza inite' lolo' ogo minelesune. 3 Ido' laza inite' matate nene evene' goho' gahali' ngeme'mo vo mino ido' Kilisitoda gi'mize lamine' ogo minune' nemu' ei' biluva've nete leli' okode nene gizi' voti libili hililisa ikevo nemu' nene laza ne'mine i-lidikelizave lo Izesu'nimu' gelamune lo golise gelo olovo' amolone' nene monoku' mo amuzo molokune lo gelo okode nene ha do dizelonido' o noloseive lo golise gelamo gele ngemaa' nooloba laza evene' lute ngemamoso' ne'mo Kilisitongumu' okode hulo helelonidoti' nene O'moso'mo do naba ma o-ledamoloseive.

4 Ido' lute nene evene' ma ngemaa' noogo ma ingine lizebolo' molaline' inite' ikevo ma nene laza lizebolo' molamivo mino hongu lo minelesune. Ido' lute ngemaa' nounive nene do laminekovo' o-ngedo mino inite' lamine' engita ma soto' ogavo ma laza lelita soto' ilinako lo engikumu' muludeu' goloso gelamolosune. Ido' evene' lute ngemaa' noogo ma leli' okode nene do hozi lo gavele ve gehesamolosune. 5 Ido' evene' lute ngemaa' noogo ma hokolize' o-ngedamo mino ledenihe minamo lizebolo' molamivo mino lihime mili lidikevo ma a'minemu' gelamo minelesune. 6 Ido' evene' lute ngemaa' noogo ma ingine goloso inite' di aka golosolo' nivavo ma laza gize' o-ngedo lolize izamo ingine mono' aka gihilelo' nivavo ma a'minemu' nene lolize izelone. 7 Ido' evene' lute ngemaa' noogo ma nadi' nadi' i-lidilizahe nemu' lamo ha geho mino engikumu' nene evene' lamine' nizave lo gele ele'vole' o-ngede mino engita inite' lamine' muki' nene mo soto' o ngemeleseive lo gelo minelone. Ido' lute ngemaa' noune' nemu' nene ingine nanite' nanite' di gopo i-lidilizahe nene ha ninge'mo voovo' minelesune.

8 Lute ngemaa' monovo nene mo osu' lamoloseiha O'moso'mi Sikalahu' ne'mo amuzo ngemavo evene' ma O'moso'mi veleuti' gamazi li soto' iga' niilizahe ido' O'moso'mi Sikalahuli'mo gono davo no'ine atokuti' laa' niilizahe ido' mono' monovo gili lamine' igi laa' niilizahe a'mine laa' niiliza inite' nene O'moso'mo lavo osu' loloseive. 9 Ee, idise gele'mo noune' inite' nene ngelo gele osu' lo gelamolosune. Ido' O'moso'mi veleti' gamazi lo soto' olone' nene ngelo lo soto' ogo osu' lamolosune. 10 Ne neiha alinge' nene inite' matakumu' gele osu' lo geleso' gamene alitelingu' nene inite' matakumu' idise olihe gele osu' lamo none' ne'mino minamo gele osu' lo gelelesunako nemu' ingine inite' mamu' li-limilizado' amivo gono'ine osu' lavo O'moso'mi veleti' gamazi li soto' iga' avesi Sikalahuli'mo lu'ningu' gono davo no'ine atokuti' laa' avesi ido' mono' monovo gili guni i mini a'minemu' li-limaa' avesi nene gohi li-limamilisave.

11 Nene ne'mino neive. Laza gomu' izipe namuno ne'mino minune' gamene mau' nene izipe namunote igi mili minaa' ani' monovolo' do molo gamazi nene lo minune' ve. Ido' lute gateu' gilune' nene gele nge lamo izipe namunote gilaa' ani' ga'ine ne'minosa nene gele minune. Laza gomu' nene izipelite inite' monovo gizeka'na hizi ningaa' adi'mino gizeka'na hizo ningaa' une' ve. Ne'mine oga' une'za alinge' laza lodive ogosa izipeliti monovolo' ne'minosa ogo molo oga' une' ma nene hulo mehedela okune. Ido' a'mine'mine ogo idise O'mosomu' gele'mo noune' nene izipe namuno ga'ine gilaa' nani' ne'mino gelo mino laza gele guno ogo gele osu' losa'mune'za alinge' evene' lodive gilaa' nani' ne'mino gelo laza ezemu' gele guno ogo gele osu' lolosune. 12 Ee, idise gamenela O'mosomu' ningo gelaa' noune' nene ne'minosa ningo gelaa' noune: O'moso mehedela neivo gapo gapo' golosou' velelati' noningunivo soto' o guno amivo ninge guno amaa' noune' ne'minosa ne neive. Idise nene ezemu' ningo gele guno osa'mune'za alinge' nene vetela ogavo aza leli' vodeu' muki' ninge osu' lo minaa' neine' ne'mino ezesi ninge guno ogo ezemu' gele osu' lolosune. Ne'mine olosunako a'mine luvoni' mono' gono daa' ani' aleve ingine O'mosomu' li-limaa' ani' gono'ine nene osu' loloseive. 13 Nene osu' loloseiha monovo sito hamo ado' O'mosomu' gele ele'vole' oga' ido' O'moso'mo inite' lamine' o'mo vilingumu' gelo gilingili ogo gizebo ogo minaa' ido' evene' lute ngemaa' monovo nene osu' lami minivi' minivi' igi ha minilisave. Ido' a'mine monovo sito hamo neuti' inite' hamo' lute ngemaa' monovo ne'mo nene ngivile' ogo inite' naba neive.